Prezidentin parlamentə təqdim etdiyi dövlət büdcəsi layihəsi açıqlanıb. Novator.az bildirir ki, Nazirlər Kabinetinin prezidentə verdiyi layihədə 2017-ci ilin dövlət büdcəsindən müdafiə xərclərinə 1 milyard 615,3 milyon manat ayrılması nəzərdə tutulurdu. Dövlət başçısının Milli Məclisə göndərdiyi layihədə isə gələn ilin müdafiə xərcləri 2 milyard 642 milyon manat nəzərdə tutulur. Bu, 1 milyard 26,7 milyon manat artım deməkdir.

Maliyyə Nazirliyi büdcə layihəsini və 2017-ci ilin dövlət və icmal büdcələrinin layihələrinin təqdimatını dərc edib. Dövlət büdcəsinin gəlirlərini 15 milyard 955 milyon manat, xərclərini 16 milyard 600 milyon manat məbləğində təsdiqləmək planlaşdırılır.

Novator.az 2017-ci ilin dövlət büdcəsindən ayrı-ayrı sahələrə nə qədər vəsait ayrılacağına nəzər salıb.

Ümumi dövlət xidmətlərinə 2 milyard 844,9 milyon manat ayırmaq planlaşdırılır.

Büdcənin xərc istiqamətləri üzrə seçmələr:

Sosial müdafiə və sosial təminat – 2 milyard 53 milyon manat

Təhsil xərcləri – 1 milyard 733,4 milyon manat

Səhiyyə xərcləri – 745,4 milyon manat

Elm xərcləri – 118,5 milyon manat.

Mədəniyyət, incəsənət, informasiya, bədən tərbiyəsi sahəsinə 282,6 milyon manat, kənd təsərrüfatı, meşə təsərrüfatı, balıqçılıq, ovçuluq və ətraf mühitin mühafizəsinə 517,4 milyon manat ayırmaq təklif olunur.

2017-ci il dövlət büdcəsi haqqında qanun layihəsi

2017-ci il dövlət və icmal büdcələrinin layihələrinin təqdimatı