Nazirlikdə kollegiya iclası
Noyabrın 8-i Daxili İşlər Nazirliyində kollegiya iclası keçirilib.
Nazirliyin mətbuat xidmətinin rəsmi məlumatına görə, iclasda bildirilib ki, bu ilin 9 ayında keçirilmiş əməliyyat-axtarış tədbirləri ilə axtarılan şəxslərin 65,4 faizi tutulub, ötən ilin analoji dövrü ilə müqayisədə göstərici 3,3 faiz yaxşılaşıb. Ölkədən kənarda olan 35, MDB ölkələrinin hüquq mühafizə orqanlarının axtardığı 190 nəfərin yeri müəyyən edilib.
İtkin düşmüş şəxslərin 71,1 faizinin yeri bilinib, müvafiq sahədə fəaliyyətin nəticələri 2015-ci ilin müvafiq dövrü ilə müqayisədə 1,4 faiz yaxşılaşıb.
Qeyd olunub ki, bu ilin ötən dövründə qanunsuz dövriyyədən təxminən 211 kiloqram güclü təsirə malik narkotik vasitə götürülüb.
9 ayda daxili işlər orqanları narkotiklərin qanunsuz dövriyyəsi ilə əlaqədar bütövlükdə 2511, o cümlədən satışla bağlı 620 müvafiq cinayət faktı müəyyən edib, 118 nəfərdən ibarət 48 cinayətkar qrupu zərərsizləşdirib. Qara bazarda dəyəri 6 milyon 774 min manat olan 784,5 kiloqram və ya ötən ilin 9 ayı ilə müqayisədə 52 kiloqram çox müxtəlif növ narkotik vasitə götürülüb, 70,8 kiloqram və ya 11,4 kiloqram çox narkotikin qaçaqmalçılıq yolu ilə ölkəyə gətirilməsinin qarşısı alınıb.
