Azərbaycanın və qonşuların bayramı
Azərbaycanda istirahət verilən 11 bayram var. Bunun 2-si dini bayramdır. Həm Ramazan bayramı, həm də Qurban bayramı 2 gün qeyd edilir.
Novruz bayramı 5 gün (20-24 mart) çəkir.
Yeni il 1-2 yanvarda, Qadınlar Günü 8 martda, Qələbə Günü 9 mayda, Respublika Günü 28 mayda, Milli Qurtuluş Günü 15 iyunda, Silahlı Qüvvələr Günü 26 iyunda, Dövlət Bayrağı Günü 9 noyabrda, Dünya Azərbaycanlılarının Həmrəyliyi Günü 31 dekabrda bayram olunur.
Novator.az qonşu ölkələrin təqvimlərinə də nəzər salıb.
Ermənistanda milad yanvarın 7-də qeyd olunur. Ölkədə müxtəlif günlərə düşən daha bir neçə dini bayram var.
Yeni il bayramı 3 gün (31 dekabr-2 yanvar) çəkir.
İş günü olmayan digər bayramlar bunlardır: Ordu Günü (28 yanvar), Qadınlar Günü (8 mart), Əmək Günü (1 may), Qələbə və Sülh Günü (9 may), Birinci Respublika Günü (28 may), Konstitusiya Günü (5 iyul), Müstəqillik Günü (21 sentyabr).
Rusiyada yeni il və milad bayramları yanvarın 1-dən başlayıb 8-10 gün davam edir.
İstirahət günü olan digər bayramlar Vətənin Müdafiəçisi Günü (23 fevral), Qadınlar Günü (8 mart), Bahar və Əmək Günü (1 may), Qələbə Günü (9 may), Rusiya Günü (12 iyun), Xalq Birliyi Günüdür (4 noyabr).
Gürcüstanda yeni il 1-2 yanvarda qeyd olunur. Ölkədə miladla (7 yanvar) yanaşı daha 6 dini bayram var.
Ölkədə 3 mart Ana Günü, 8 mart Qadınlar Günü, 9 may Qələbə Günü, 26 may Müstəqillik Günü kimi bayram edilir.
Türkiyədə Ramazan və Qurban bayramları bir həftəyədək çəkir.
Ölkənin digər rəsmi bayramları bunlardır: Yeni il (1 yanvar), Milli Suverenlik və Uşaqlar Günü (23 aprel), Əmək və Həmrəylik Günü (1 may), Atatürkü Anma, Gənclik və İdman Günü (19 may), Zəfər Günü (30 avqust), Cümhuriyyət Günü (29 oktyabr).
İranda Ramazan və Qurban bayramları 1 gün çəkir. Ən uzun bayram İran təqvimi ilə yeni il kimi qeyd olunan Novruz bayramına düşür, azı 7 gün çəkir. Əsas dövlət bayramı fevralın 11-də qeyd olunan İslam İnqilabının Qələbə Günüdür.
