Milyarder iddiaçı
Novator.az Respublikaçılar Partiyasının ABŞ prezidentliyinə namizədi Donald Trampı təqdim edir.
Prezident seçkisi noyabrın 8-nə təyin olunub. Həmin gün seçicilər 538 nəfərlik Seçicilər Kollegiyasının tərkibini müəyyən edəcək. Dekabrın 19-da Seçicilər Kollegiyası dövlət başçısını seçəcək, prezidentin adı 2017-ci il yanvarın 5-də açıqlanacaq. Prezident seçilmək üçün 270 səs kifayət edir.
Seçki yarışında Donald Trampın əsas rəqibi Demokratlar Partiyasından Hillari Klintondur.
Donald Tramp 1946-cı il iyunun 14-də Nyu-York ştatında doğulub. Ata tərəfdən alman, ana tərəfdən şotland əsillidir.
Donald əvvəlcə Nyu-York ştatının Kyu-Forest məktəbində oxuyub. 13 yaşında valideynləri onu Nyu-York Hərbi Akademiyası internat məktəbinə göndəriblər.
1964-cü ildə Donald Pensilvaniya Universitetinin Uorton Biznes Məktəbinə daxil olub, 1968-ci ildə həmin təhsil ocağını iqtisadçı ixtisası ilə bitirib.
Tramp əmək fəaliyyətinə daşınmaz əmlak sahəsində çalışan atasının şirkətində başlayıb və bütün karyerasını tikinti biznesinə həsr edib. 4 milyard dollar varidatın sahibidir.
Donald üç dəfə ailə qurub.
İlk həyat yoldaşı çex model İvanka Zelniçkova olub. Onların izdivacı 15 il (1977-1992) çəkib.
1993-cü ildən 1999-cu ilədək Donald amerikalı aktrisa və prodüser Marle Meyplzlə ailə həyatı yaşayıb.
Hazırkı xanımı – sloveniyalı fotomodel Melanya Knaussla Donald 2005-ci ildə evlənib.
Üç nikahdan Donaldın beş övladı var.
1999-cu ildən Respublikaçılar Partiyasının üzvü olan Donald Tramp 2016-cı ilin prezident seçkisi marafonunda bütün partiyadaşlarını geridə qoyub. Mayın əvvəlindən Respublikaçılar Partiyasından prezidentliyə tək iddiaçı qalan Donald Tramp iyulun 19-da keçirilən qurultayda rəsmi namizəd statusu alıb.
