Vergi Apellyasiya Şurası 13 müraciəti təmin edib
Vergilər Nazirliyi müraciətlərə baxılması barədə yeni hesabat yayıb. Novator.az-ın məlumatına görə, hesabatda bildirilir ki, 2016-cı ilin üçüncü rübündə Vergi Apellyasiya Şurasının icraatında 23 vergi ödəyicisi üzrə 36 müraciət olub. 3 müraciət 2016-ci ilin ikinci rübündən qalıq qalıb, 33 müraciət isə üçüncü rübdə alınıb.
9 müraciət kameral vergi yoxlamasının, 12 müraciət səyyar vergi yoxlamasının, 8 müraciət operativ vergi nəzarətinin nəticələri, 6 müraciət artıq ödənilmiş vergilərin qaytarılması, 1 müraciət xronometraj metodu ilə aparılmış müşahidənin nəticələri ilə bağlı olub, 10 müraciət qalıq qalıb.
Şurada baxılaraq müvafiq qərarlar qəbul edilmiş 36 müraciətin 13-ü tam və ya qismən təmin edilib, 4-ü təmin edilməyib, 1-inin icraatına xitam verilib, 8-i üzrə ödəyicilərə izahedici məktublar göndərilib, 10 müraciət üzrə inzibati araşdırmanın müddəti növbəti rübə keçib.
Vergi Apellyasiya Şurası 2008-ci ildən fəaliyyət göstərir. Qurumun missiyası vergi ödəyicilərinin hüquqlarının və qanuni mənafelərinin müdafiəsi, onların təkrar şikayətlərinə (korrupsiya ilə əlaqədar hüquqpozmalarla bağlı müraciətlər istisna olmaqla) qanunvericiliklə müəyyən edilmiş qaydada baxılması, habelə məhkəməyə qədər sadələşdirilmiş prosedurlara əməl edilməklə mübahisələrin obyektiv şəkildə həll edilməsidir.
