İqtisadi Əməkdaşlıq və İnkişaf Təşkilatı 2015-ci il üzrə iş vaxtı araşdırması aparıb. Novator.az-ın məlumatına görə, yekun hesabatda bildirilir ki, ötən il dünyada iş vaxtı sarıdan rekordçu ölkə Hindistan olub. Bu ölkədə adamlar ilin 2365 saatını çalışıblar.

İkinci yerdə 2246 saatla Meksika dayanıb. Üçüncü yerdə duran Kosta-Rikada əhali ötən ilin 2230 saatını iş başında keçirib.

İlk 10-luqda həmçinin Cənubi Koreya (2113 saat), Yunanıstan (2042), Çili (1988), Rusiya (1978), Polşa (1963), Latviya (1903) yer alır.

Türkiyə 16-cı yerdə göstərilir. İqtisadi Əməkdaşlıq və İnkişaf Təşkilatı bu ölkəni 2014-cü il üzrə qiymətləndirib, əhalinin illik iş vaxtının 1832 saat olduğunu açıqlayıb.

Siyahıda ABŞ 18-ci (1790), İtaliya 24-cü (1725), Yaponiya 25-ci (1719), Kanada 26-cı (1706), İspaniya 27-ci (1691), Böyük Britaniya 29-cu (1674) yerdə qərarlaşıb.

41 ölkənin yer aldığı siyahıda son pilləni Almaniya tutur. Bu ölkənin əhalisi ötən il 1371 saat işləyib.