Milli Məclisin 14 oktyabr iclasında sosial güzəştləri nəzərdə tutan qanun layihələri qəbul olunub. “Şəhid adının əbədiləşdirilməsi və şəhid ailələrinə edilən güzəştlər haqqında” qanunda dəyişikliyə əsasən, orta ixtisas təhsili müəssisələrində və Milli Elmlər Akademiyasının magistraturasında ödənişli formada təhsil alan şəhid ailəsi üzvləri təhsil haqqını ödəməkdən azad olunur.
APA-nın məlumatına görə, “Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” qanuna da yeniliklər edilib. Qanuna əlavə və dəyişikliyə əsasən, valideynlərini itirmiş və valideyn himayəsindən məhrum olanlar Milli Elmlər Akademiyasının magistraturasında təhsil haqqından azaddır. Həmin kateqoriyadan olan vətəndaşlar ilk peşə-ixtisas təhsili, orta ixtisas təhsili, ali təhsil müəssisələrini və AMEA-nın magistraturasını bitirdikləri zaman müvafiq icra hakimiyyəti orqanının təsdiq etdiyi qaydada mövsümi paltar, habelə ölkə üzrə orta əməkhaqqının iki mislindən az olmamaqla birdəfəlik pul vəsaiti ilə təmin olunacaq. Onlara təhsil aldıqları müddətdə dərslik və dərs ləvazimatlarının alınması üçün müavinətlər də veriləcək.
