Cahangir Hacıyevə 15 il həbs cəzası verildi
Bakı Ağır Cinayətlər Məhkəməsində Beynəlxalq Bankın İdarə Heyətinin sabiq sədri Cahangir Hacıyev və digər 7 nəfərin işi üzrə proses başa çatıb. Report.az-ın məlumatına görə, oktyabrın 14-də hökm oxunub, Cahangir Hacıyev 15 il müddətinə azadlıqdan məhrum edilib.
Cahangir Hacıyev Beynəlxalq Bankın filial rəhbərləri olmuş Anar Sultanov, İlqar Abdullayev, Yusif Ələkbərov, Kənan Orucov, Məmməd Cahangirov, “İnter Security” MMC-nin sabiq direktoru İbrahim Hüseynov, Bakı Fındıq Emalı Zavodunun direktoru işləmiş Azad Cavadovla birgə mühakimə olunub.
Azad Cavadov 10 il 11 ay, Yusif Ələkbərov 8 il 6 ay, Kənan Orucov 7 il 6 ay, İbrahim Hüseynov 7 il 23 gün iş alıblar.
İlqar Abdullayev, Məmməd Cahangirov, Anar Sultanova şərti iş verilib.
İttihama əsasən, 2001-2015-ci illərdə Beynəlxalq Bankın İdarə Heyətinin sədri vəzifəsində işləmiş Cahangir Hacıyev digər şəxslərlə qabaqcadan əlbir olaraq mütəşəkkil qrup yaradıb və həmin qrupa rəhbərlik edib, qulluq mövqeyindən sui-istifadə edərək özünün, ailə üzvlərinin və digər şəxslərin adına kart hesabları açıb və həmin hesablara külli miqdarda pul vəsaitlərinin köçürülməsi barədə qanunsuz göstərişlər verib. Qeyd olunur ki, Cahangir Hacıyev və cinayətin digər iştirakçıları Müşahidə Şurasının qərarı olmadan Beynəlxalq Bankın filiallarında bir çox fiziki şəxsin adına 47 milyon 144 min manat kredit pullarını rəsmiləşdirərək mənimsəyiblər, Beynəlxalq Banka ümumilikdə 211 milyon 597 min manat məbləğində ziyan vurublar.
