Bu il nə qədər güzəştli kredit verilib?
Bu il 1843 sahibkarlıq subyektinin investisiya layihəsi üçün 122 milyon manat güzəştli kredit ayrılıb. Sahibkarlığa Kömək Milli Fondunun icraçı direktoru Şirzad Abdullayev oktyabrın 13-də Şabran rayonunda keçirilən işgüzar forumda belə deyib. 90-a yaxın sahibkarın iştirak etdiyi forumda iri taxılçılıq, intensiv bağçılıq, cins heyvandarlıq və istixana təsərrüfatlarının, çörək istehsalı müəssisəsinin və otelin yaradılması üzrə nümunəvi investisiya layihələrinin təqdimatı keçirilib.
Şirzad Abdullayev bildirib ki, indiyədək Quba-Xaçmaz iqtisadi rayonunda fəaliyyət göstərən sahibkarlıq subyektlərinin 2277 investisiya layihəsinin maliyyələşdirilməsinə 183,7 milyon manat güzəştli kredit verilib.
İşgüzar forumda Quba-Xaçmaz iqtisadi rayonunda fəaliyyət göstərən 46 sahibkar 633 min manat güzəştli kredit alıb. Rəsmi məlumata görə, əsasən heyvandarlıq, arıçılıq, tərəvəzçilik, bağçılıq, mebel istehsalı sahələrinin inkişafına yönəldiləcək kreditlərin reallaşdırılması hesabına 90 yeni iş yerinin açılması mümkün olacaq.
