Referendum aktı dərc edilib
Mərkəzi Seçki Komissiyası 26 sentyabr referendumunda qəbul olunmuş aktı dərc edib. Qurumun oktyabrın 11-də keçirilmiş iclasında ümumxalq səsverməsinin nəticələri barədə protokol təsdiq edilərək referenduma yekun vurulub. Daimi siyahıda olan seçicilərin 25%-dən çoxu (69,7%) səsvermədə iştirak etdiyindən ümumxalq səsverməsi baş tutmuş, referendum aktı layihəsində təqdim edilən 29 hissənin hər birinin lehinə səsvermədə iştirak etmiş seçicilərin yarısından çoxu səs verdiyindən layihə qəbul edilmiş sayılıb.
Bəzi nöqsanlara görə 11 saylı Qaradağ seçki dairəsinin 14, 12 saylı Qaradağ-Binəqədi-Yasamal seçki dairəsinin 10 və 68 saylı Cəlilabad kənd seçki dairəsinin 2 saylı seçki məntəqələri üzrə səsvermənin nəticələri tam, 64 saylı Sabirabad ikinci seçki dairəsinin 35 saylı seçki məntəqəsi üzrə isə referendum aktı layihəsinin 25, 26, 27, 28 və 29-cu hissələri üzrə səsvermənin nəticələri etibarsız hesab edilib. Həmin məntəqələrin seçki komissiyaları, habelə səsvermə prosedurlarına tam əməl ediməməsinə və səsvermənin təşkilində yol verilmiş nöqsanlara görə 15 saylı Yasamal birinci seçki dairəsinin 21 və 19 saylı Nərimanov birinci seçki dairəsinin 34 saylı seçki məntəqələrinin məntəqə seçki komissiyaları buraxılıb.
Novator.az xatırladır ki, referendumun nəticələrinə əsasən, ana qanunda prezident seçilmək, baş nazir təyin edilmək, hakim olmaq, deputat mandatı almaq, nazir postu tutmaq üçün yaş senzi aradan qaldırılır, prezidentin səlahiyyət müddəti 5 ildən 7 ilə artır, dövlət başçısı növbədənkənar prezident seçkisi elan etmək, parlamenti buraxmaq hüququ alır.
Başqa bir əsas yenilik vitse-prezident postlarının təsisini nəzərdə tutur. Birinci vitse-prezidenti və vitse-prezidentləri Azərbaycan prezidenti vəzifəyə təyin və vəzifədən azad edir, növbədənkənar prezident seçkisi zamanı dövlət başçısının səlahiyyətləri birinci vitse-prezidentə keçir.
Mərkəzi Seçki Komissiyasının protokolu
Azərbaycan Respublikasının Konstitusiyasında dəyişikliklər haqqında referendum aktı
