Səhiyyə Nazirliyinin Analitik Ekspertiza Mərkəzi dərman vasitəsi idxalçılarına və xarici istehsalçı müəssisələrin rəsmi nümayəndəliklərinə xəbərdarlıq edib.

Xəbərdarlıqda bildirilir ki, Tarif (qiymət) Şurasının dərman vasitələrini qiymətləndirməsi prosesi ilə bağlı keçid dövrü artıq yekunlaşıb. “Dərman vasitələri haqqında” qanunla və Nazirlər Kabinetinin 2007-ci il 13 iyul tarixli qərarıyla təsdiq olunmuş “Dərman vasitələrinin dövlət qeydiyyatı və reyestrinin aparılması qaydaları”na əsasən dərman vasitələrinin istifadəsinə aid təlimat Azərbaycan dilində olmalıdır.

Bununla əlaqədar olaraq Analitik Ekspertiza Mərkəzi xəbərdarlıq edir ki, 2017-ci il yanvarın 1-dən istifadə təlimatı Azərbaycan dilində olmayan və Səhiyyə Nazirliyinin Farmakoloji və Farmakopeya Ekspert Şurasının təsdiqləmədiyi dərman vasitələrinin idxalına icazə verilməyəcək.