Tramp önə çıxır?
ABŞ-da prezidentliyə namizədlərin seçki kampaniyası davam edir. Son simpatiya sorğusunda Respublikaçılar Partiyasının namizədi Donald Trampın Demokratlar Partiyasından rəqibi Hillari Klintonu keçdiyi bildirilir. Novator.az-ın məlumatına görə, “Rasmussen Reports” şirkətinin apardığı sorğuya cəlb olunan respondentlərin 43%-i Trampı, 41%-i isə Klintonu dəstəkləyib.
“Rasmussen Reports” tədqiqatçıları ictimai rəy sorğusunu 1000 amerikalı arasında aparıb. Avqustun ortalarında aparılan analoji sorğuda Tramp 39%-lə Klintondan (41%) geridə qalmışdı.
2003-cü ildə yaradılan “Ramussen Reports” ictimai rəy sorğusu ilə məşğuldur. Şirkət yerli və dövlət səviyyəsində seçkilər istiqamətində də tədqiqatlar aparır.
ABŞ-da prezident seçkisi noyabrın 8-də keçiriləcək. Dövlət başçısını ştatların seçki günü müəyyənləşən nümayəndələri – 538 nəfərlik Seçicilər Kollegiyası seçir. Ştatların neçə nümayəndə seçməsi əhalinin sayından asılıdır.
Prezident seçilmək üçün 538 nümayəndədən 270-nin səsini qazanmaq lazımdır.
Donald Tramp 1946-cı ildə Nyu-York ştatında doğulub. Nyu-York Hərbi Akademiyasını və Pensilvaniya Universitetinin Uorton Biznes Məktəbini bitirib. Tikinti maqnatıdır.
Hillari Klinton 1947-ci ildə Çikaqoda doğulub. Yel Universitetinin hüquq fakültəsini bitirib. 1993-2001-ci illərdə prezident postunu tutmuş Bill Klintonun xanımıdır. 2009-2013-cü illərdə ABŞ-ın dövlət katibi olub.
