“Azadlıq” cavab gözləyir
“Azadlıq” qəzeti Beynəlxalq Bankdan heç bir cavab ala bilmir. Oktyabrın 7-də Novator.az-a danışan baş redaktorun birinci müavini Rahim Hacıyev belə deyib.
Rahim Hacıyev bildirib ki, redaksiyadan tələb edilən bütün sənədlər bankın Səbail filialına təqdim olunub: “Amma hələ bizə heç bir cavab verilməyib. Nə vaxt cavab veriləcəyi də bildirilmir”.
Avqustun 20-də qəzetin maliyyə direktoru Faiq Əmirli həbs ediləndən redaksiya bank əməliyyatı apara bilmir. Maliyyə direktorunun səlahiyyətlərinin icrası üçün başqa şəxsin imza nümunəsinin notarial qaydada təsdiqlənməsi lazım gəlib. Bu iş uzandığı üçün qəzetin “Azərbaycan” nəşriyyatına borcu artıb, sentyabrın 5-də “Azadlıq”ın çapından imtina edilib.
İmza nümunəsi məsələsi həll edilsə də, qəzetin hesabı olan Beynəlxalq Bank baş redaktor Qənimət Zahidin Rahim Hacıyevə verdiyi etibarnamənin notarial qaydada təsdiqini istəyib. Bu etibarnamə əsasında Rahim Hacıyev baş redaktor əvəzi hesab edilir.
