Sentyabrın 29-da Heydər Əliyev Mərkəzində V Bakı Beynəlxalq Humanitar Forumu işə başlayıb.

AZƏRTAC-ın məlumatına görə, prezident İlham Əliyev rəsmi açılış mərasimində iştirak edib, nitq söyləyib.

Rusiya baş nazirinin müavini Olqa Qolodets prezident Vladimir Putinin forum iştirakçılarına müraciətini oxuyub və çıxış edib. BMT baş katibinin müşaviri Cihan Sultanoğlu baş katib Pan Gi Munun müraciətini səsləndirib, İSESCO-nun baş direktoru Əbdüləziz Osman əl-Tuveycrinin və YUNESKO-nun baş direktorunun müavini Qetaçyu Enqidanın çıxışları olub.

Forum işini plenar iclasla və dəyirmi masa rəhbərlərinin çıxışları ilə davam etdirir.

Bakı Beynəlxalq Humanitar Forumu qlobal xarakterli məsələlərə dair geniş spektrli dialoqlar, fikir mübadilələri və müzakirələr aparmaq məqsədilə tanınmış dövlət xadimlərini, elmin müxtəlif sahələri üzrə Nobel mükafatı laureatlarını və nüfuzlu beynəlxalq təşkilatların rəhbərlərini, o cümlədən dünyanın siyasi, elmi və mədəni elitasının görkəmli nümayəndələrini bir araya toplayan tədbirdir.