Tərtərdə məşğulluq tədbiri
Əmək və əhalinin sosial müdafiəsi naziri Səlim Müslümov Tərtər rayonunda özünüməşğulluq proqramında iştirak üçün müraciət edən və özünüməşğulluq üzrə təlimlərə cəlb olunmuş vətəndaşlarla görüşüb. Sentyabrın 27-də yayılan rəsmi məlumata görə, nazir deyib ki, özünüməşğulluq proqramında iştirak üçün müraciət edən vətəndaşlar təlimlərə cəlb edilir: “Təlimlərin aparılması üçün seçilmiş təlimçilərə Beynəlxalq Əmək Təşkilatının baş təlimçisi nazirliyin Göyçay rayonundakı Regional Peşə Tədrisi Mərkəzində bir həftəlik təlim kursları keçir. Artıq ayrı-ayrı rayonlar üzrə 75 nəfər bu kursları uğurla başa vurmaqla sertifikatla təmin olunub. Həmin təlimçilər onlarla bağlanmış müqavilə əsasında öz rayonlarında özünüməşğulluq proqramına qatılan vətəndaşlar üçün təlimlərə başlayıblar. Bu təlimlərə 370 nəfərə yaxın işaxtaran və işsiz vətəndaş cəlb olunub”.
Müslümov bildirib ki, təlimçilərin hazırlanması üçün kurslar davam etdirilir və ümumilikdə ölkə üzrə 142 təlimçinin hazırlanması nəzərdə tutulub: “İşaxtaran və işsiz vətəndaşlar təlimlərdə iştirak etdikdən sonra həmin insanlardan təlim prosesini başa vuraraq uğurlu biznes-plan hazırlamış və müdafiə etmiş 1500 nəfər şəxs özünüməşğulluq proqramına cəlb olunacaq”.
Nazir Tərtər rayonunda da iki qrup üzrə təlimlərə cəlb olunmuş 23 nəfər işaxtaran və işsiz şəxsin bu təlimlərdə biznesin təşkili üzrə bilik və bacarıqlara mükəmməl səviyyədə yiyələnəcəklərinə əminliyini ifadə edib: “Çünki yaxşı biznesin qurulması lazımi biliklərə, bacarıqlara malik olmağı tələb edir. Məhz bundan sonra uğurlu biznes-plana sahib ola biləcəksiniz, bu da şəxsi biznesiniz üçün müqavilə əsasında sizlərə mal və materialların verilməsini şərtləndirəcək. Onların qanunvericilikdə müəyyən edilmiş qaydada sığortalanması da təmin olunacaq. Sonrakı bir il ərzində sizin biznes fəaliyyətinizin müsbət nəticəsi artıq bu mal və materialların daimi olaraq sizlərin şəxsi mülkiyyətinizə verilməsinə imkan yaradacaq”.
