Ermənistan parlamenti hökumətin yeni layihəsini ilk oxunuşda bəyənib
Sentyabrın 27-də Ermənistan parlamenti hökumətdə struktur dəyişiklikləri layihəsini ilk oxunuşda qəbul edib. Novator.az-ın məlumatına görə, hökumətin təqdim etdiyi layihədə İqtisadiyyat Nazirliyinin İnvestisiya və Sahibkarlığa Dəstək Nazirliyinə, Enerji və Təbii Sərvətlər Nazirliyinin Enerji İnfrastrukturu və Sərvətlər Nazirliyinə çevrilməsi nəzərdə tutulur.
Digər yenilik Nəqliyyat və Rabitə Nazirliyinin bazasında Nəqliyyat, Rabitə və İnformasiya Texnologiyaları Nazirliyi yaradılmasıdır. Şəhərsalma Nazirliyi isə komitəyə çevrilir.
Sentyabrın 13-dən Ermənistan hökumətinə Karen Karapetyan baş nazirlik edir. Əvvəl baş nazir postunu Ovik Abramyan tuturdu. Baş nazir dəyişdiyi üçün Ermənistan hökuməti yenilənir. Yeni hökumətin tərkibi ilə bağlı ilk sərəncamlar sentyabrın 20-də imzalanıb. Vaçe Qabrielyan baş nazirin müavini, beynəlxalq iqtisadi inteqrasiya və islahatlar naziri postuna təyinat alıb. Hökumət Aparatının rəhbəri – nazir vəzifəsi David Arutyunyana tapşırılıb.
Maliyyə naziri vəzifəsinə Vardan Aramyan, nəqliyyat və rabitə naziri vəzifəsinə Vahan Martirosyan, kənd təsərrüfatı naziri postuna İqnati Arakelyan, enerji və təbii sərvətlər naziri vəzifəsinə Aşot Manukyan təyin edilib. Bu nazirlər hökumətdə yeni şəxslərdir.
