Ermənistanda nazirliklər yenidən qurulur
Ermənistan hökumətində struktur dəyişiklikləri aparılacaq. Novator.az-ın məlumatına görə, Nazirlər Kabinetinin 22 sentyabr iclasında çıxış edən aparat rəhbəri – nazir David Arutyunyan belə deyib.
Arutyunyan qeyd edib ki, İqtisadiyyat Nazirliyi İnvestisiya və Sahibkarlığa Dəstək Nazirliyinə çevriləcək.
Enerji və Təbii Sərvətlər Nazirliyinin Enerji İnfrastrukturu və Sərvətlər Nazirliyinə çevrilməsi planlaşdırılır.
Nəqliyyat və Rabitə Nazirliyinin bazasında Nəqliyyat, Rabitə və İnformasiya Texnologiyaları Nazirliyi yaradılacaq.
Şəhərsalma Nazirliyinin isə komitəyə çevriləcəyi qeyd olunur.
Ayrı-ayrı nazirliklərin strukturunda yeniliklərin tətbiqi də nəzərdə tutulur.
Sentyabrın 13-dən hökumətə Karen Karapetyan baş nazirlik edir. Əvvəl baş nazir postunu Ovik Abramyan tuturdu. Baş nazir dəyişdiyi üçün Ermənistan hökuməti yenilənir. Yeni hökumətin tərkibi ilə bağlı ilk sərəncamlar bu həftə imzalanıb. Vaçe Qabrielyan baş nazirin müavini, beynəlxalq iqtisadi inteqrasiya və islahatlar naziri postuna təyinat alıb. Hökumət Aparatının rəhbəri – nazir vəzifəsi David Arutyunyana tapşırılıb.
Maliyyə naziri vəzifəsinə Vardan Aramyan, nəqliyyat və rabitə naziri vəzifəsinə Vahan Martirosyan, kənd təsərrüfatı naziri postuna İqnati Arakelyan, enerji və təbii sərvətlər naziri vəzifəsinə Aşot Manukyan təyin edilib. Bu nazirlər hökumətdə yeni şəxslərdir.
