Yerevanda hərbi parad
Sentyabrın 21-i Ermənistan paytaxtı Yerevanın Azadlıq meydanında hərbi parad keçirilib. Novator.az-ın məlumatına görə, Ermənistan-Rusiya birləşmiş qoşun qrupunun komandanı general-mayor Andranik Makaryanın rəhbərliyi altında keçirilən hərbi paradı müdafiə naziri Seyran Ohanyan qəbul edib.
Ermənistan prezidenti Serj Sərkisyan başda olmaqla ölkə rəhbərliyinin, həmçinin işğalçı Dağlıq Qarabağ rejiminin başçısı Bako Saakyanın qatıldığı paradda “İskəndər” operativ-taktiki raket kompleksi, “Toçka U” və “Elbrus” (R-17 ballistik raketləri ilə) taktiki raket kompleksləri, başqa silah və texnika nümayiş olunub.
Hərbi parad dövlət müstəqilliyinin 25 illiyinə həsr edilib. 1991-ci il sentyabrın 21-də Ermənistanda müstəqillik referendumu keçirilib, iştirakçıların 99 faizi respublikanın SSRİ-dən ayrılmasına səs verib.
