Qırğızıstan prezidenti referendumu dəstəklədi
Qırğızıstan prezidenti Almazbek Atambayev konstitusiya dəyişiklikləri layihəsinin son variantına xeyir-dua verib. Sentyabrın 21-də dövlət başçısı layihənin referenduma çıxarılmasını dəstəkləyən bəyanat yayıb.
Novator.az-ın məlumatına görə, konstitusiyaya dəyişikliklər layihəsi parlamentin 4 fraksiyasının (Sosial Demokrat, Respublika – Ata Yurd, Tərəqqi və Qırğızıstan partiyaları) təklifidir. Layihədə baş nazirin səlahiyyətlərini artırmaq təklif olunur. Referendum aktında deputatın eyni zamanda baş nazir və ya baş nazirin müavini postu tutmasının mümkünlüyü barədə müddəa da yer alır.
Ümumxalq səsverməsini bu ilin noyabr ayında keçirmək nəzərdə tutulur. Konstitusiya dəyişiklikləri layihəsi məhkəmə sisteminin, Konstitusiya Məhkəməsinin fəaliyyətində yenilik təkliflərini də əhatə edir.
Parlament respublikası olan Qırğızıstanda baş nazirin rəhbərlik etdiyi hökumət ali icraedici orqandır. Baş nazir postuna namizədi parlamentdə deputatların yarıdan çoxunu təşkil edən fraksiya və ya koalisiya irəli sürür. Parlament hökumətin tərkibini və proqramını təsdiqlədikdən sonra prezident baş naziri və hökumət üzvlərini vəzifəyə təyin edir.
