Naxçıvan Muxtar Respublikasının Dövlət Statistika Komitəsi 8 aylıq sosial-iqtisadi göstəriciləri açıqlayıb. Hesabata görə, bu ilin yanvar-avqust aylarında muxtar respublikada 1 milyard 602 milyon 760 min manatlıq ümumi daxili məhsul (ÜDM) istehsal olunub, bu da 2015-ci ilin müvafiq dövrü ilə müqayisədə 1,4 faiz çoxdur. Hər bir nəfərə düşən ÜDM-in həcmi 2015-ci ilin müvafiq dövrü ilə müqayisədə 3,9 faiz artaraq 3593,6 manata çatıb.

8 ayda muxtar respublikada əsas kapitala 628 milyon 260 min 800 manat həcmində investisiya yönəldilib. Bu, bir il öncəki göstəricidən 0,7 faiz çoxdur.

2016-cı ilin yanvar-avqust aylarında 266 milyon 35 min manat həcmində kənd təsərrüfatı məhsulu istehsal olunub. Bu, 2015-ci ilin müvafiq dövründəki göstəricini 5,5 faiz üstələyib.

Hesabat dövründə muxtar respublikada əhalinin gəlirləri 2015-ci ilin müvafiq dövrü ilə müqayisədə 1,8 faiz artaraq 1 milyard 176 milyon 416 min 400 manat, onun hər bir nəfərə düşən həcmi isə 0,7 faiz yüksələrək 2637,7 manat təşkil edib.

Qeyd olunan dövrdə muxtar respublikaya 234 min 363 nəfər turist gəlib. Bu, 2015-ci ilin müvafiq dövründəki göstəricidən 4,5 faiz və ya 10181 nəfər çoxdur.

Avqustun 1-nə muxtar respublikada əhalinin sayı ötən ilin müvafiq dövrü ilə müqayisədə 4894 nəfər və ya 1,1 faiz artaraq 447 min 104 nəfər olub.

Xəbəri AZƏRTAC-ın Naxçıvan Muxtar Respublikasındakı bürosu yayıb.