Korrupsiya ilə mübarizə qanununda nə dəyişir?
Sentyabrın 21-də Milli Məclisin müdafiə, təhlükəsizlik və korrupsiya ilə mübarizə komitəsinin iclası keçirilib. AZƏRTAC xəbər verir ki, iclasda “Korrupsiyaya qarşı mübarizə haqqında” qanunda dəyişikliklər layihəsinə baxılıb. Layihə qanuna “Korrupsiya ilə əlaqədar hüquqpozmalarla bağlı məlumat vermə” və “Korrupsiya ilə əlaqədar hüquqpozmalarla bağlı məlumat verən şəxsin dövlət müdafiəsi” məzmunlu 11-1-ci və 11-2-ci maddələrin əlavə olunmasını nəzərdə tutur. Əlavələrə görə, korrupsiya ilə əlaqədar hüquqpozmalarla bağlı məlumatı hər bir şəxs yazılı (o cümlədən elektron) və ya şifahi formada verə bilər. İdarə, müəssisə və təşkilatlarda çalışan işçilər korrupsiya ilə əlaqədar hüquqpozmalarla bağlı məlumatları səlahiyyətli struktur bölməyə verə bilər. Barəsində məlumat verilən şəxsə, həmçinin araşdırmanın nəticəsində birbaşa və ya dolayısı ilə maraqlı olan şəxslərə korrupsiya ilə əlaqədar hüquqpozmalarla bağlı məlumatın araşdırılması həvalə edilə bilməz.
İclasda Mülki Prosessual Məcəllədə dəyişikliklər layihəsi də müzakirə edilib. Layihəyə əsasən, qanuna “Terrorçuluğun maliyyələşdirilməsinə qarşı mübarizə çərçivəsində aktivlərin dondurulması haqqında” məzmunlu 305.1.14-cü maddə əlavə ediləcək. Dəyişikliklərə görə, terrorçuluğun maliyyələşdirilməsinə qarşı mübarizə çərçivəsində aktivlərin dondurulması haqqında ərizəyə məhkəməyə təqdim olunduqdan sonra 5 gün müddətində baxılır və müvafiq qərar qəbul edilir.
Qanun layihələri Milli Məclisin plenar iclasına tövsiyə olunub.
