UEFA-da yeni prezident
Sloveniyalı Aleksander Çeferin UEFA-nın prezidenti seçilib. Səsvermə sentyabrın 14-ü Afinada, UEFA-nın növbədənkənar konqresində keçirilib. Aleksander Çeferin 55 UEFA üzvünün 42-nin səsini alıb. Onun hollandiyalı rəqibi Mixael van Praq 13 səs toplayıb. Yeni prezidentin səlahiyyət müddəti 2 il 6 ay sonra keçiriləcək növbəti konqresə qədər müəyyən edilib.
FİFA-nın Etika Komitəsinin Arbitraj Palatası ötən il dekabrın 21-də UEFA prezidenti Mişel Platinini korrupsiya qalmaqalına görə 8 il müddətinə futbol fəaliyyətindən uzaqlaşdırıb. Sonradan cəza 4 ilə endirilib, bunun ardınca Mişel Platini UEFA prezidenti vəzifəsindən istefa verib. O, təşkilata 2007-ci ildən rəhbərlik edirdi.
Novator.az bildirir ki, Aleksander Çeferin 1967-ci ildə anadan olub. Hüquqşünasdır. Futbol idarəçiliyi ilə 2005-ci ildən məşğuldur. 2011 və 2015-ci illərdə Sloveniya Futbol İttifaqının prezidenti seçilib.
