Dövlət Sərhəd Xidməti 2016-cı ilin avqust ayı üzrə hesabat açıqlayıb. Novator.az bildirir ki, hesabata əsasən, ay ərzində dövlət sərhədini pozan 67 nəfər saxlanıb. Onların 29 nəfəri Azərbaycan, 7 nəfəri Qana, 5 nəfəri İran, 5 nəfəri Özbəkistan, 4 nəfəri Nigeriya, 3 nəfəri Rusiya, 3 nə­fəri Banqladeş, 3 nəfəri Ukrayna, 2 nəfəri Gürcüstan, 2 nəfəri Moldova, 2 nəfəri Türkiyə, 1 nəfəri Pakistan, 1 nəfəri Əfqanıstan vətəndaşıdır.

Sərhəd rejim qaydalarını pozduqlarına görə 1123 halda 1706 nəfər, o cümlədən yaşıl sərhəddə 13 halda 21 nəfər, Xəzər dənizində 32 halda 48 nəfər, sərhəd nəzarəti məntəqələrində 1637 nəfər saxlanaraq barələrində müvafiq tədbirlər görülüb.

Azərbaycan Respublikasının hüquq mühafizə orqanlarının axtardığı 398 nəfər aşkarlanaraq aidiyyəti orqanlara təhvil verilib.

Narkotik vasitələrin qeyri-qanuni dövriyyəsinə qarşı mübarizə tədbirləri nəticəsində 10 halda 143 kiloqram 672 qram narkotik maddə aşkar edilərək götürülüb.

Qaçaqmalçılıq fəaliyyətinə qarşı mübarizə çərçivəsində həyata keçirilmiş tədbirlər nəticəsində 62 halda ümumi dəyəri təqribən 1 milyon 603 min manat olan qaçaqmal saxlanıb.