14 ayda uçot dərəcəsi 12% artıb
Novator.az Azərbaycanda uçot dərəcəsinin son dövrlər necə dəyişdiyinə nəzər salıb. Uçot dərəcəsi Mərkəzi Bankın kommersiya banklarına verdiyi borclar üzrə faiz dərəcəsidir.
Mərkəzi Bankın İdarə Heyəti 14 sentyabr 2016-cı ildən uçot dərəcəsini 15% səviyyəsinə qaldırıb. Qərarda qeyd olunur ki, inflyasiyaya təsir edən daxili və xarici amillərin davranışındakı dəyişikliklər əlavə antiinflyasiya tədbirlərinə zərurət yaradıb: “Bu istiqamətdə mühüm addımlardan biri kimi kəskin məzənnə tərəddüdlərini tənzimləmək, bununla da valyuta bazarında gözləntilərə və tarazlığa təsir etmək məqsədilə Dövlət Neft Fondu və Mərkəzi Bank valyuta hərraclarında xarici valyutanın təklifini əhəmiyyətli artırıb. Eyni zamanda makroiqtisadi proqnozları, tədiyyə balansında və valyuta bazarındakı meylləri nəzərə alaraq Mərkəzi Bank pul siyasəti alətlərinin kəmiyyət parametrlərini dəyişib. İdarə Heyəti 14 sentyabr 2016-cı ildən likvidlik əməliyyatları üzrə faiz dəhlizinin aşağı həddini 12%, yuxarı həddini 18%, uçot dərəcəsini isə 15% səviyyəsinə qaldırmaq barədə qərar qəbul edib”.
Novator.az bildirir ki, 2015-ci il iyulun 13-dən Mərkəzi Bank uçot dərəcəsini 3,5%-dən 3%-ə endirib. İdarə Heyətinin iclasında çıxarılmış qərar qeyri-neft sektorunda iqtisadi artıma maliyyə dəstəyini gücləndirmək, kredit faizlərinin enməsini sürətləndirməklə investisiyaları stimullaşdırmaq, kiçik və orta biznesin maliyyələşməsinin və əhalinin ipoteka kreditləşməsinin dəyərinin optimallaşmasına monetar zəmin yaratmaq məqsədilə əsaslandırılıb.
3%-lik uçot dərəcəsi bu il fevralın 15-dək qüvvədə olub. Həmin gün Mərkəzi Bankın İdarə Heyəti uçot dərəcəsini 5% müəyyən etmək barədə qərar çıxarıb. Martın 4-də uçot dərəcəsi 7%-ə, avqustun 8-də isə 9,5%-ə qaldırılıb.
