Keyfiyyətsiz məktəbli geyimləri aşkarlanıb
Məktəblilər üçün tikilən geyim formalarının standartların tələblərinə uyğun olmadığı, saxta əmtəə nişanından istifadə barədə şikayət araşdırılıb. Standartlaşdırma, Metrologiya və Patent üzrə Dövlət Komitəsi yanında Texniki Tənzimləmə və Standartlaşdırma üzrə Dövlət Nəzarəti Xidməti müəyyən edib ki, Bakıdakı “Binə”, “Sədərək” ticarət mərkəzlərində, Əhmədli qəsəbəsində yerləşən ticarət mərkəzində, 8-ci kilometr qəsəbəsindəki bazar, həmçinin Şəki, Oğuz, Göyçay şəhərlərinin geyim satış məntəqələrində mənşəyi bilinməyən, başqasına məxsus əmtəə nişanını özününküləşdirərək keyfiyyətsiz məktəbli geyimləri satılır.
Xidmət bildirir ki, “Binə” və “Sədərək” ticarət mərkəzlərindəki satış məntəqələrindən götürülən nümunələr Təcrübə-Sınaq Mərkəzinin yüngül sənaye məhsullarının sınağı laboratoriyasına təqdim olunub. Laborator müayinələrin nəticəsində müəyyən olunub ki, məktəbli formaların üzlük və içlik parçaları mövcud normativ sənədlərin tələblərinə uyğun deyil. Normativ sənədlərə əsasən, içlik parçanın tərkibində kimyəvi liflərin (sintetikanın) miqdarının 50 faizdən və üzlük parçanın tərkibində kimyəvi liflərin (sintetikanın) miqdarının 67 faizdən çox olmaması nəzərdə tutulsa da, sınaqların nəticələrinə görə, kimyəvi liflərin (sintetikanın) miqdarı müvafiq olaraq 98,9 faiz və 93,7 faizdir.
Satışdakı mənşəyi bilinməyən bütün məhsulların üzərində “Bakı Tikiş Evi” ASC-yə məxsus “BTE” əmtəə nişanından qeyri-qanuni istifadə olunduğu aşkar edilib.
Hazırda araşdırmanın nəticələri əsasında qanunvericiliyə uyğun tədbirlər görülür.
Qanunvericiliyə əsasən, məktəbli formaları ölkədə qüvvədə olan dövlətlərarası standart (“Məktəb yaşlı oğlan və qızlar üçün üst geyimləri” standartı) əsasında müəssisələrin hazırladığı və dövlət qeydiyyatına alınmış texniki şərtlərin tələblərinə uyğun istehsal edilir.
