“Azadlıq” qəzetinin yayım direktoru, AXCP sədrinin köməkçisi Faiq Əmirli barəsində seçilmiş həbs qətimkan tədbirinin ləğv olunması üçün verilmiş apellyasiya şikayətinə baxılıb. Bakı Apellyasiya Məhkəməsində Həsən Əhmədovun sədrlik etdiyi hakimlər kollegiyası şikayəti təmin etməyib. Sentyabrın 2-də qapalı keçirilən məhkəmə iclasında F.Əmirli özü də iştirak edib. O, ittihamın saxta olduğunu, ona heç bir aidiyyəti olmadığını söyləyib.

F.Əmirlinin vəkili Aqil Layıcov “Azadlıq” radiosuna bildirib ki, qərarı alandan sonra Avropa Konvensiyasının 5-ci (azadlıq hüququ) maddəsinin pozuntusundan Avropa İnsan Hüquqları Məhkəməsinə şikayət edəcəklər: “Bizim onsuz da apellyasiya məhkəməsindən ədalətli, obyektiv qərar çıxarılması ilə bağlı gözləntimiz yox idi. Sadəcə, Avropa Məhkəməsinə müraciət etmək üçün bu instansiyanı keçmək tələb olunur. Gözlədiyimiz kimi də oldu”.

Faiq Əmirli avqustun 20-də Bakıda tutulub. Avqustun 22-də Nəsimi Rayon Məhkəməsi onun barəsində 3 ay müddətinə həbs qətimkan tədbiri seçib.

İstintaq onu ABŞ-da yaşayan türkiyəli ilahiyyatçı Fətullah Gülənin rəhbərlik etdiyi “Hizmət hərəkatı”nın nümayəndəsi olmaqda, Azərbaycanda “fətullahçılığı” təbliğ etməkdə, dini ayinlərin icrası adı altında vətəndaşların hüquqlarını pozmaqda, öz qulluq mövqeyindən istifadə etməklə sosial, dini nifrət və düşmənçilik salmaq cəhdində günahlandırır.

Faiq Əmirli, “Azadlıq” qəzetinin redaksiyası və AXCP rəhbərliyi ittihamları rədd edir, həbsin siyasi xarakter daşıdığını vurğulayır.