Kanadada qadın polislərə hicab geyinməyə icazə verilib. Novator.az-ın məlumatına görə, bunu Kanadanın İctimai Təhlükəsizlik Nazirliyinin nümayəndəsi Skott Berdsli açıqlayıb.

Skott Berdsli Kanada polisinin bütün insanların mədəniyyətinə, dini dəyərlərinə hörmətlə yanaşıldığı bir qurum olduğunu vurğulayıb. O bildirib ki, Kanada polisində işləyən müsəlman qadınların hicab geyinməsinə icazə verilməsi məqsədilə ölkənin baş polis komissarı Bob Polson polis haqqında nizamnaməyə müvafiq düzəlişlər edib.

Skott Berdslinin sözlərinə görə, bundan sonra islam dininə etiqad edən qadın polislər Kanadanın hər yerində müsəlmanların ənənəvi baş geyimində ola bilərlər.

Əvvəllər Kanadanın yalnız Toronto və Edmonton şəhərlərində qadın polislərə hicab geyinməyə icazə verilirdi.

Hazırda Böyük Britaniya, İsveç, Norveç və ABŞ-ın bir sıra ştatlarında qadın polislərin hicabda olmasına icazə verilir.