İradə Zeynalova “Vremya”dan gedir
Rusiyanın Azərbaycan əsilli telejurnalisti İradə Zeynalova yeni mövsümdən “1-ci kanal”ın həftəlik “Vremya” informasiya-analitik proqramının aparıcısı olmayacaq. Məlumat avqustun 25-də yayılıb.
Novator.az xəbər verir ki, İradə Zeynalovadan sonra “Vremya”nı “Ekspert” media holdinqinin direktoru Valeri Fadeyevin aparacağı bildirilir. Məlumata görə, İradə Zeynalova “1-ci kanal”ı tərk etmir, tok-şoularından birini aparacaq.
“1-ci kanal” İradə Zeynalovanın proqramı tərk etməsi ilə bağlı məlumata şərh vermir.
İradə Zeynalova 1972-ci ildə Moskvada məmur Aftandil Zeynalovun ailəsində doğulub.
1997-ci ildən Rusiyanın müxtəlif televiziya kanallarında işləyən İradə Zeynalova Rusiya Televiziya Akademiyasının üzvüdür.
“1-ci kanal”dakı “Vremya” proqramını 2012-ci ildən aparan telejurnalist buna qədər Böyük Britaniyada, İsraildə müxbir bürosunun rəhbəri olub.
İradənin bacısı Svetlana Zeynalova da jurnalistdir.
