Avqustun 24-ü saxlanan Azərbaycan Xalq Cəbhəsi Partiyasının (AXCP) üzvü İsmayıl Rəsulova 1 aylıq inzibati həbs cəzası verildiyi bildirilir.

İsmayıl Rəsulovun oğlu Elşən İsmayılov Turan agentliyinə deyib: “Polisə getdik, dedilər məhkəməyə aparıblar. Məhkəməyə getdik, orda da heç bir xəbər vermədilər. Özü nəhayət zəng edib, 1 aylıq həbs edildiyini söylədi”.

Elşən İsmayılov telefon söhbəti zamanı atası ilə uzun danışmağa imkan verilmədiyini vurğulayıb.

Onun sözlərinə görə, şəkər xəstəsi olan atası onlardan iynə-dərmanlarını, paltarlarını göndərmələrini istəyib.

İsmayıl Rəsulovu avqustun 24-də Qaradağ Rayon Polis İdarəsinin 38-ci polis bölməsinin əməkdaşları saxlayıblar.

Onun nədə günahlandırıldığı hələ də açıqlanmır.

İsmayıl Rəsulov ikinci qrup Qarabağ əlilidir, şəkər xəstəsidir.