Ukrayna prezidenti Donbasda neçə hərbçi itirdiklərini açıqlayıb
Ukrayna Silahlı Qüvvələri Donbas vilayətində iki ildən çoxdur davam edən hərbi münaqişədə 2 min 500-dən çox hərbçisini itirib. Novator.az-ın məlumatına görə, Ukrayna prezidenti Pyotr Poroşenko avqustun 24-də ölkənin müstəqillik günü ilə bağlı çıxışında belə deyib.
Pyotr Poroşenkonun sözlərinə görə, iki ildən artıqdır davam edən müharibəyə dönüb baxanda əminliklə demək olar ki, düşmən heç bir strateji tapşırığını yerinə yetirə və Ukraynanı diz çökdürə bilməyib: “2504 hərbçimiz bunun uğrunda həlak olub”.
2014-cü ilin fevral ayında Ukraynada hakimiyyət xalq üsyanı ilə dəyişib, Rusiyaya yaxın qüvvələri Qərb meylli qüvvələr əvəzləyib. Bundan dərhal sonra Rusiya Ukraynanın Krım bölgəsini hərbi güclə tutaraq özünə birləşdirib və Donbasda iki separatçı rejimin əli ilə bu bölgənin bir hissəsini işğal edib.
BMT-nin məlumatına görə, Ukraynada 2014-cü ildən bəri davam edən silahlı münaqişədə azı 9 min 449 nəfər həlak olub, 21 min 843 nəfər yaralanıb.
