Qazaxıstanın Almatı şəhərində baş verən atışmada həlak olanların sayı 6-ya çatıb. Novator.az-ın məlumatına görə, iyulun 19-da günorta saatlarında yaralı polis əməkdaşlarından biri, 30 yaşlı polis leytenantı Timur Beqasilov xəstəxanada keçinib.

İyulun 18-i səhər Almatıda naməlum silahlı şəxs şəhərin mərkəzi rayonlarından birinin polis idarəsinə və Milli Təhlükəsizlik Komitəsinin departamentinə hücum çəkib. Hücum zamanı 3 polis, 2 mülki şəxs hadisə yerində həlak olub. Yaralanmış 6 polis əməkdaşı və 2 mülki şəxs xəstəxanaya yerləşdirilib. Ölkədə ən yüksək həddə terror təhlükəsi elan olunub.

Almatıda aparılan xüsusi əməliyyat nəticəsində cinayəti törədən naməlum şəxs yaxalanıb. Ölkə prezidenti Nursultan Nazarbayev baş verənləri terror aktı adlandırıb. Şəhərdə aparılan antiterror əməliyyatı başa çatdıqdan sonra terror təhlükəsi orta həddə endirilib.