Livandakı 250 mindən çox suriyalı uşaq məktəbə gedə bilmir
Livanda qeydiyyatda olan 250 mindən çox suriyalı uşağın məktəblərdə təhsil almaq imkanı yoxdur. Novator.az-ın məlumatına görə, “Human Rights Watch” beynəlxalq hüquq müdafiəsi təşkilatının iyulun 19-da yaydığı məruzədə belə deyilir.
Məruzədə bildirilir ki, Livan dövləti bir milyondan çox suriyalı qaçqını qəbul edib, onların 500 mini məktəb yaşlı uşaqlardır. Bu uşaqlara dövlət məktəblərində ödənişsiz təhsil almağa icazə verilib. Livanın Təhsil Nazirliyinin məlumatına əsasən, 2015-ci ildə ölkədə 250 minədək gəlmə uşaq dövlət və özəl məktəblərə gedib. Onların əksəriyyəti Suriyadan qaçqın düşənlərdir.
“Human Rights Watch”un məruzəsində deyilir ki, Livanın heç də bütün məktəbləri hakimiyyətin qaçqınlarla bağlı tapşırıqlarını yerinə yetirmir. Bundan əlavə, qaçqınlar yoxsul olduqları üçün uşaqlarını məktəbə göndərə bilmirlər. Çünki qaçqın valideynlərin məktəb xərclərini ödəmək imkanı yoxdur. Belə ailələrin uşaqları təhsil almaq əvəzinə işləməyə məcbur qalır.
Suriyada 5 ildir vətəndaş müharibəsi davam edir. Bu müddətdə yarım milyon suriyalı öldürülüb, 2 milyon adam yaralanıb, əhalinin 45%-i qaçqına çevrilib, onların 4 milyonu vətəni tərk edib.
