İstanbulun Atatürk Hava Limanında iyunun 28-i axşam saat 10 radələrində törədilən terror aktında 36 nəfər həlak olub, 147 nəfər yaralanıb. 3 terrorçu-kamikadzenin özlərini xarici uçuş terminalının gediş-gəliş zolaqları və avtomobil dayanacağında partlatdığı xəbər verilir.

İlkin əlamətlərinə görə, terroru İŞID təşkilatı törədib.

Azərbaycanın İstanbuldakı baş konsulluğunda terror aktı ilə bağlı qaynar xətt yaradılıb. Baş konsul Məsim Hacıyevin AZƏRTAC-a verdiyi məlumata görə, zərər çəkənlər arasında azərbaycanlıların olub-olmadığı araşdırılır.

Prezident İlham Əliyev Türkiyənin dövlət başçısı Rəcəb Teyyub Ərdoğana teleqram yollayıb. Teleqramda deyilir: “İstanbulun Atatürk Hava Limanında törədilmiş amansız terror aktı nəticəsində çox sayda insanın həlak olması və yaralanması xəbəri bizi olduqca sarsıtdı. Biz bu qanlı hadisədən son dərəcə hiddətlənir, bütün dünya üçün dəhşətli bir bəlaya çevrilmiş terrorizmə qarşı mübarizə sahəsində qüvvələrin səfərbər olunmasını, birgə və qətiyyətli səylər göstərilməsini vacib və zəruri hesab edirik.

Baş vermiş bu faciə ilə əlaqədar Sizə, həlak olanların ailələrinə və yaxınlarına, qardaş Türkiyə xalqına öz adımdan və Azərbaycan xalqı adından dərin hüznlə başsağlığı verir, yaralananlara şəfa diləyirəm. Allah rəhmət eləsin!”