Erkin Qədirlinin ölkədən çıxmasına icazə verilməyib
REAL Hərəkatı İdarə Heyətinin üzvü Erkin Qədirlinin ölkədən çıxmasına icazə verilməyib.
Erkin Qədirli iyunun 17-də Facebook səhifəsində yazıb ki, gecə reysi ilə o, Türkiyəyə istirahətə gedəcəkmiş. Bakı hava limanında uçuşa qeydiyyatdan və sərhəd yoxlamasından keçib. Pasportuna çıxışa icazə verən möhür vurulub. Amma sərhədi keçdiyi anda onu dayandırıblar. Deyiblər ki, möhür yanlış vurulub, ölkədən çıxmasına qadağa var. Bundan sonra Erkin Qədirlinin pasportunda çıxışa icazə verən möhürün üstündən “Ləğv olundu” sözləri yazılmış möhür vurulub və o, Bakı aeroportundan geri qaytarılıb.
Erkin Qədirli qadağanı kimin və niyə qoyduğunu sərhədçilərdən öyrənə bilməyib.
O, güman edir ki, bu qadağa polisin “Qanun” nəşriyyatından götürdüyü, REAL-a məxsus flayerlərlə bağlıdır. Həmin flayerlərlə bağlı “Qanun” nəşriyyatı ilə sifariş müqaviləsini imzalayanlardan biri Erkin Qədirli olub: “Flayerlərlə bağlı bizi polisə də çağırmışdılar. İndi məlum oldu ki, ölkədən getmək qadağası da qoyulubmuş”.
İyunun 11-12-də Bakı Şəhər Baş Polis İdarəsinin 15 nəfərdən çox əməkdaşı “Qanun” Nəşrlər Evinin binasını əhatəyə alıb. Bildirilib ki, buraya bomba qoyulduğu haqda məlumat daxil olub. Ofisdən bomba tapılmayıb. Axtarış başa çatanda polislər nəşriyyatdan REAL hərəkatının həbsdə olan sədri İlqar Məmmədovun ad günü münasibətilə “Qanun”a sifariş verdiyi flayerləri müsadirə edərək aparıblar. REAL bu flayerlərlə 1 milyon insanı İlqar Məmmədovun həyat yolu və həbsi barədə məlumatlandırmaq istəyirmiş. REAL hesab edir ki, “Qanun”dakı axtarışda əsl məqsəd elə bu flayerləri müsadirə etmək olub.
İlqar Məmmədov 2013-cü il fevralın 4-də, İsmayıllıda hökumət əleyhinə iğtişaşlar (23-24 yanvar 2013-cü il) təşkil etmək ittihamı ilə tutulub 7 il azadlıqdan məhrumetmə cəzası alıb.
İlqar Məmmədov 1970-ci il iyunun 17-də Bakıda doğulub.
