Gürcüstanın Cənubi Osetiya bölgəsindəki separatçı rejim bölgəni Rusiyanın tərkibinə qatmaq üçün 2017-ci ildə referendum keçirməyi planlaşdırır. Novator.az xəbər verir ki, bununla bağlı mayın 26-da separatçı rejimin rəhbəri Leonid Tibilov və rejimin parlament adlandırdığı qurumun sədri Anatoli Bibilov kağız imzalayıblar.

İmzalanma separatçı rejimin iclasında baş tutub.

İmzalanmış kağızda yazılıb ki, referendum Cənubi Osetiyada keçiriləcək növbəti “prezident seçkisi”ndən sonra olacaq.

Bundan əvvəl separatçı lider Leonid Tibilov bildirmişdi ki, səsvermədə “Cənubi Osetiya konstitusiyası”nın dəyişdirilməsi təklifi irəli sürüləcək. Həmin dəyişiklik bölgəyə Rusiyanın tərkibinə daxil olmaq üçün Moskvaya müraciət etmək imkanı verəcək.

Gürcüstanın Abxaziya, Cənubi Osetiya bölgələri 1990-cı illərdən özünü müstəqil dövlət elan etmiş rejimlərin əlindədir. 2008-ci ildə Rusiya Abxaziya və Cənubi Osetiyanı hərbi təcavüzlə işğal edərək onları “müstəqil dövlət” kimi tanıyıb. Hər iki bölgədə Rusiyanın hərbi bazaları var.