Rusiyalıların əksəriyyəti Leninin basdırılmasını istəyir
Rusiyalıların əksəriyyəti Leninin meyitinin torpağa basdırılmasına tərəfdardır. Novator.az xəbər verir ki, Ümumrusiya İctimai Rəyi Öyrənmə Mərkəzinin keçirdiyi sorğunun nəticələri bunu göstərir.
Vladimir Lenin (Ulyanov) Rusiyada bolşevik inqilabının lideri, Sovet Rusiyasının və SSRİ-nin ilk rəhbəridir. O, 1870-ci ilin aprel ayının 22-də anadan olub, 1924-cü ilin yanvarında ölüb. Leninin meyiti Moskva şəhərinin mərkəzi meydanındakı mavzoleydə mumiyalanaraq saxlanır.
Ümumrusiya İctimai Rəyi Öyrənmə Mərkəzinin keçirdiyi sorğuda respondentlərin 60%-i Leninin meyitinin basdırılmasına tərəfdar olub. Onlardan 36%-i Leninin tez bir zamanda dəfn olunmasını istəyir. Qalan 24% isə hesab edir ki, dəfn prosesi Leninə dəyər verən nəsil dəyişənə qədər ləngidilsə yaxşıdır.
Respondentlərin 32%-i Leninin indiki kimi mavzoleydə saxlanmasına tərəfdardır.
Respondentlərin 65%-i bildirib ki, Lenin qərar qəbul edərkən vətəndaşların maraqlarından çıxış edib. Respondentlərin 23%-ə qədəri isə əks fikir söyləyib.
Respondentlərin 31%-i Leninin öz zamanında Rusiyaya fayda verdiyi, 23%-i isə ziyan vurduğu qənaətindədir.
