Mərkəzi qərargahı Parisdə yerləşən “Sərhədsiz reportyorlar” beynəlxalq jurnalist təşkilatı 2016-cı il üzrə mətbuat azadlığı indeksini açıqlayıb. Transparency.az xəbər verir ki, hesabata 180 ölkənin adı salınıb. Azərbaycan siyahıda 163-cü yerdədir, Bəhreyn (162), Liviya (164), Səudiyyə Ərəbistanı ilə (165) qonşudur (Reytinq cədvəli).

Mətbuat azadlığı indeksinin ön sırasında Finlandiya dayanır. Bu ölkə 2010-cu ildən reytinqdə 1-cidir.

Hollandiya 2-ci, Norveç 3-cü sırada dayanır. Ən sonda Türkmənistan (178), Şimali Koreya (179) və Eritreya (180) gəlir.

İndeksə görə, Avropa jurnalistlər üçün ən azad regiondur. Afrika qitəsi ikinci sıradadır və Amerika qitəsini qabaqlayır.

Hesabata əsasən, bəzi ölkələr 2016-cı ildə mətbuat azadlığı sarıdan yüksəlişə nail olublar. Məsələn, Tunis reytinq cədvəlində 30 pillə irəliləyərək 96-cı sıraya qalxıb. 107-ci yerdə olan Ukrayna bu il 22 pillə irəliləyib. Polşa isə reytinq cədvəlində 29 pillə geriləyərək 47-ci sıraya düşüb. 150-ci yerdə olan Tacikistan 34 pillə geriləyib.

Azərbaycanın qonşularına gəlincə, Rusiya mətbuat azadlığı indeksində 148-ci, Ermənistan 74-cü, Gürcüstan 64-cü, İran 169-cudur.

Keçmiş SSRİ məkanından Estoniya 14-cü, Litva 35-ci, Latviya 24-cü, Moldova 76-cı, Belarus 157-ci, Özbəkistan 166-cı yerdədir.