Rumıniya əhalisinin dörddə bir hissəsi yoxsulluqdan əziyyət çəkir. Avropa Statistika Agentliyi aprelin 15-də belə məlumat yayıb.
Novator.az xəbər verir ki, agentlik yoxsulluq statistikasını hazırlayarkən meyar kimi əhalinin mənzilini isitmək üçün ödəniş edə bilməyən və ya ildə bir həftəlik məzuniyyətə çıxa bilməyən hissəsini götürüb.
Agentliyin hesabatına görə, 2015-ci ildə Rumıniyada 4,9 milyon adam, yəni ölkə əhalisinin 24,6%-i yoxsulluqdan əziyyət çəkib. Rumıniya Avropa İttifaqı ölkələri arasında həyat səviyyəsi sarıdan Bolqarıstandan sonra ikinci yeri tutub. Bolqarıstan əhalisinin 43,2%-i, yəni əhalinin 2,5 milyon nəfəri yoxsulluqdan əziyyət çəkir.
Statistik məlumatlara əsasən, son illər Rumıniyada yoxsulluğa qarşı mübarizədə müəyyən irəliləyiş əldə edilib. 2012-ci ildə bu ölkədə yoxsulluğun göstəricisi 29,9%, 2013-cü ildə 28,8%, 2014-cü ildə 26,3% olub.
2014-cü ildə Avropa İttifaqı ölkələrində ən az yoxsulluq İsveçdə (0,7%) qeydə alınıb. Həmin il Almaniyada əhalinin yoxsul hissəsi 5%, Fransada isə 4,8% təşkil edib.
2015-ci ilin hesablamasına əsasən, adam sayına görə Avropa İttifaqı ölkələri arasında yoxsulların sayı İtaliyada daha çoxdur: 7 milyon nəfər. Bu, İtaliya əhalisinin 11,5%-i deməkdir.
Ümumilikdə Avropa İttifaqı ölkələri əhalisinin 8,2%-i, yəni 41 milyon nəfərdən çoxu yoxsulluqla üz-üzə qalıb.