“GoBankingReates” reytinq şirkəti yaşayış standartları hesabatı açıqlayıb. Reytinq alıcılıq qabiliyyəti, ev kirayəsinin, ərzaq və xidmətlərin qiymətlərinə əsaslanıb. Cədvəl tərtib olunarkən meyar kimi Nyu-Yorkun uyğun göstəriciləri əsas götürülüb.

Ən bahalı ölkələr reytinq cədvəlinin son pillələrində yer alır. Onların içərisində ən bahalıları Norveç, İsveçrə, Honkonq, Baham və Bermud adalarıdır.

Novator.az xəbər verir ki, Azərbaycan yaşayış standartları sarıdan 112 ölkə arasında 23-cü yerdə dayanır. Ukrayna ondan bir pillə geridədir. Bu ölkədə alıcılıq qabiliyyəti Nyu-Yorkdakından 71,9% aşağıdır, ev kirayəsi 91,1%, ərzaq 77,3%, xidmətlər 71,2% ucuzdur.

Reytinq cədvəlinə Cənubi Afrika Respublikası başçılıq edir. Hindistan 2-ci, Kosovo 3-cü yerdədir.

Keçmiş SSRİ məkanından Qazaxıstan 5-ci, Moldova 15-ci, Gürcüstan 29-cu, Estoniya 32-ci, Rusiya 39-cu, Ermənistan 42-ci, Latviya 45-ci, Litva 48-ci, Belarus 50-ci, Özbəkistan 69-cu pillədədir.

Cədvəldə Türkiyə 31-ci, İran 66-cidir.