Ermənilərin top atəşi Tərtərdə 160 evə ziyan vurub
Ermənilərin son günlər Tərtər rayonunu top atəşinə tutması nəticəsində 160 evə ziyan dəyib. Zədələnən evlərin bir çoxu tamamilə yararsız hala düşüb. Bir neçə saat əvvəl isə Həsənqaya kəndində mərmi partlayışı 2000-ci il təvəllüdlü Turanə Həsənlinin həyatına son qoyub.
Bu barədə AZƏRTAC-ın cəbhə bölgəsinə ezam olunmuş əməkdaşları Tərtər Rayon İcra Hakimiyyətinə istinadda məlumat verirlər. Aprelin 5-i səhər saatlarında erməni hərbçiləri Həsənqaya kəndini top atəşinə tutub və ağır qəlpə yaraları alan 16 yaşlı gəncin həyatını xilas etmək mümkün olmayıb.
Ermənistan ordusunun təxribatı nəticəsində cəbhə xəttində başlayan gərginlik müddətində Tərtərdə 3 mülki şəxs həlak olub, 6 sakin yaralanıb. Rayon mərkəzi, ətraf kəndlər daim ermənilərin atəş hədəfindədir. Buna baxmayaraq, sakinlər evlərini tərk etmək barədə düşünmür, Azərbaycan ordusunun cəbhə xəttində uğurlarını izləyir və qələbəyə tam arxayın olduqlarını bildirirlər.
