Maliyyə Nazirliyi dövlət büdcəsinin 2016-cı ilin birinci rübündə icrasına dair məlumat yayıb. Transparency.az bildirir ki, hesabata görə, 2016-cı ilin birinci rübündə dövlət büdcəsinin mədaxili 3 milyard 678,1 milyon manat, xərcləri 2 milyard 623,5 milyon manat olub, 1 milyard 54,6 milyon manat məbləğində büdcə artıqlığı (profisit) yaranıb.

Dövlət büdcəsinin mədaxili 3 milyard 570,6 milyon manat proqnoza qarşı 3 milyard 678,1 milyon manat və yaxud 3 faiz çox olub.

Vergilər Nazirliyi mədaxil proqnozunu 101,4 faiz icra edib, dövlət büdcəsinə 1 milyard 542 milyon manat vəsait köçürülüb. Həmin vəsaitin 78,5 faizi və yaxud 1 milyard 210,7 milyon manatı qeyri-neft sektorundan daxilolmaların payına düşür, bu da 2015-ci ilin müvafiq dövrünə nisbətən 9 faiz-bənd çoxdur.

Dövlət Gömrük Komitəsi proqnoza 114,8 faiz əməl edərək büdcəyə 416,9 milyon manat vəsait təmin edib, bu da ötən ilin eyni dövrü ilə müqayisədə 21,9 faiz və yaxud 74,9 milyon manat çoxdur.

Dövlət büdcəsindən maliyyələşdirilən təşkilatların ödənişli xidmətlərindən daxilolmaları 47,5 milyon manat təşkil edib.

Sair daxilolmalar üzrə büdcəyə 11,7 milyon manat vəsait gəlib.

Dövlət Neft Fondundan dövlət büdcəsinə 1 milyard 660 milyon manat vəsait transfert edilib.

2016-cı ilin 1-ci rübündə dövlət büdcəsinin xərcləri proqnoza nisbətən 73,3 faiz və yaxud 2 milyard 623,5 milyon manat icra olunub. Dövlət büdcəsi xərclərinin 54,4 faizi və yaxud 1 milyard 426,7 milyon manatı sosial xərclərin (əməyin ödənişi fondu, təqaüd və sosial müavinətlər, dərman və ərzaq xərcləri) maliyyələşdirilməsinə yönəldilib, bu da ötən ilin eyni dövrü ilə müqayisədə 3,8 faiz və yaxud 52 milyon manat çoxdur.

Dövlət əsaslı vəsait qoyuluşu xərclərindən elm, təhsil, səhiyyə, sosial, mədəniyyət, idman və digər sosial-mədəni və məişət təyinatlı obyektlərin tikintisinə və yenidən qurulmasına 16 milyon manat, enerji, su və qaz təchizatı, nəqliyyat, kommunal, meliorasiya infrastrukturlarının tikintisinə, yenidən qurulmasına və digər sahələrə 153,4 milyon manat, o cümlədən Naxçıvan Muxtar Respublikasında həyata keçirilən investisiya layihələrinin maliyyələşdirilməsinə dövlət büdcəsinin dövlət əsaslı qoyuluşu xərclərindən 4,8 milyon manat vəsait yönəldilib.

İcmal büdcənin gəlirləri 4 milyard 473,2 milyon manat, xərcləri isə 3 milyard 348,3 milyon manat icra olunub. İcmal büdcənin artıqlığı 1 milyard 124,9 milyon manat təşkil edib.