Suriyada 5 ildir vətəndaş müharibəsi davam edir. Bu müddətdə bu ölkədə 88 jurnalist öldürülüb. Novator.az xəbər verir ki, “Press Emblem Campaign” (PEC) qeyri-hökumət təşkilatı belə bir hesabat yayıb.

Təşkilat dünya ictimaiyyətini münaqişə zonalarında jurnalistlərin təhlükəsizliyini təmin etmək üçün tədbirlər görməyə çağırıb.

PEC-in təmsilçisi BMT-nin İnsan Hüquqları Şurasının Cenevrədə keçirilən 31-ci sessiyasında deyib ki, təşkilat Suriyada 5 il ərzində 88 jurnalistin qətlini sənədləşdirib. Onlardan 13-ü 2015-ci ildə öldürülüb. 2016-cı ilin yanvarından bəri 2 jurnalist öldürülüb, bir neçəsi yaralanıb.

PEC-in məruzəsində bildirilir ki, Suriya 4 ildir KİV nümayəndələri üçün ən təhlükəli ölkələr sırasına daxildir. Bu ölkədə münaqişə iştirakçılarının əlinə keçən reportyorlara ağır işgəncələr verilib, bəzilərinin başı kəsilib, bəzi yerlərdə media nümayəndələri artilleriya atəşinə tutulub.

Təşkilatın məlumatına görə, Əfqanıstan, İraq, Pakistan və Yəməndə də jurnalistlər daima münaqişələrin qurbanına çevrilir.

“Press Emblem Campaign” təşkilatı 2004-cü ildə yaradılıb, BMT-də məşvərətçi statusa malikdir.