Xədicə İsmayılın şantaj olunması ilə əlaqədar prokurorluğa müraciət göndərilib
“Azadlıq” radiosunun əməkdaşı Xədicə İsmayılın şantaja məruz qalması ilə əlaqədar Bakı Şəhər Prokurorluğuna müraciət olunub.
Söhbət jurnalistin Bakıda yaşadığı evində gizli kameranın quraşdırılması məsələsindən gedir. Belə bir kameranın quraşdırıldığı 2012-ci ilin martında, həmin kameranın qeydə aldığı şəxsi həyata aid görüntülər internetlə yayılan vaxt bəlli olub.
Jurnalistin vəkili Yalçın İmanov 2016-cı il martın 1-də Bakı şəhər prokuroru Əziz Seyidova göndərdiyi məktubunda yazıb ki, jurnalistin şantaj edilməsi və şəxsi həyatına müdaxilə faktı üzrə 2012-ci il martın 15-də Baş Prokurorluq Cinayət Məcəlləsinin 156-cı (şəxsi həyatın toxunulmazlığı) maddəsi ilə cinayət işinə başlayıb, istintaqın aparılması Bakı Şəhər Prokurorluğuna həvalə olunub. İstintaq zamanı Xədicə İsmayıl zərərçəkmiş qismində tanınıb. Amma cinayət işi üzrə icraat Xədicə İsmayılın özünə də, vəkilinə də məlum olmayan vaxtda dayandırılıb.
Yalçın İmanov qeyd edib ki, indiyə qədər istintaqla bağlı hansı tədbirlərin görülməsi barədə jurnalistə, onun nümayəndəsinə heç bir məlumat verilməyib.
Yalçın İmanov məktubunda cinayət işi üzrə istintaqın dayandırılması barədə qərarın surətini, həmçinin indiyə qədər görülən tədbirlər, aparılan istintaq hərəkətləri barədə ətraflı məlumat verilməsini xahiş edib.
Xədicə İsmayıl 2014-cü il dekabrın 5-dən həbsdədir. Bakı Ağır Cinayətlər Məhkəməsi 2015-ci il sentyabrın 1-də ona 7 il 6 ay azadlıqdan məhrumetmə cəzası kəsib. Bundan başqa o, 3 il müddətinə vəzifə tutmaq hüququndan məhrum edilib. Məhkəmə Xədicə İsmayılı qanunsuz sahibkarlıq, vergidən yayınma, vəzifədən sui-istifadədə təqsirli bilib. Jurnalistin özü və müdafiəçiləri ittihamları qəbul etmir və həbsin siyasi sifarişə söykəndiyini, X.İsmayılın apardığı jurnalist araşdırmaları ilə bağlı olduğunu bildirir.
1976-cı ildə Bakıda anadan olan Xədicə İsmayıl 1997-ci ildə Bakı Dövlət Universitetini bitirib. Jurnalist fəaliyyətinə “Günaydın” qəzetində başlayıb, bir sıra KİV-lərdə, o cümlədən “Zerkalo”, “Exo” qəzetlərində, “Amerikanın səsi” radiosunda çalışıb. 2008-ci ildən “Azadlıq” radiosunda işləyib. 2008-2010-ci illərdə radionun Bakı bürosuna rəhbərlik edib.
