Rusiyada HİV virusundan ölənlərin sayı 13% artıb
Ötən il Rusiyada immun çatışmazlığı (HİV) virusundan ölənlərin sayı 2014-cü illə müqayisədə 13% artıb. Novator.az-ın məlumatına görə, QİÇS-lə Mübarizə Federal Elmi-Metodik Mərkəzinin rəhbəri akademik Vadim Pokrovski fevralın 17-də belə açıqlama verib.
Pokrovski ötən həftəyədək HİV virusuna yoluxmuş 1 milyon 6 min 388 nəfər Rusiya vətəndaşının qeydiyyatdan keçdiyini bildirib. O, ötən həftə daha 1500 nəfərin qeydiyyata alındığını, epidemiyanın son dərəcə aktivləşdiyini vurğulayıb.
Akademik indiyədək HİV virusundan 212 min 579 nəfərin həyatını itirdiyini, onlardan 27 min 564-nün 2015-ci ildə öldüyünü bildirib.
Mərkəz rəhbəri HİV infeksiyalı adamların orta yaş həddinin 35 olduğunu qeyd edib. Onun sözlərinə görə, 30-40 yaş arası adamların təxminən 22%-i HİV virusuna yoluxub.
Ekspertin açıqlamasına əsasən, HİV virusuna yoluxma hallarının 55%-i narkotikdən istifadənin nəticəsidir. Cinsi yolla yoluxma 43% həddindədir.
