Yanvar ayında qiymətlər necə dəyişib?
2016-cı ilin yanvar ayında ərzaq məhsulları 8,7 faiz, qeyri-ərzaq məhsulları 5,6 faiz, əhaliyə göstərilən pullu xidmətlər 2,1 faiz bahalaşıb. Ümumilikdə istehlak məhsullarının və əhaliyə göstərilən pullu xidmətlərin qiymətləri əvvəlki ayla müqayisədə 5,8 faiz artıb. Transparency.az-ın məlumatına görə, Dövlət Statistika Komitəsi fevralın 10-da belə hesabat yayıb.
Hesabata əsasən, ay ərzində düyünün, unun, çörəyin, qarabaşaq yarmasının, makaron məmulatlarının, mal, qoyun və toyuq ətinin, kolbasa məmulatlarının, balıq məhsullarının, süd məhsullarının, yumurtanın, kərə və bitki yağlarının, şəkər və şəkər tozunun, limonun, portağalın, naringinin, almanın, armudun, bananın, heyvanın, narın, xurmanın, şabalıdın, xiyarın, pomidorun, kələmin, badımcanın, bibərin, çuğundurun, yerkökünün, kartofun, soğanın, sarımsağın, göyərtinin, spirtli içkilərin, tütün məmulatlarının qiymətlərində artım olub.
Yanvar ayında qeyri-ərzaq məhsullarından parçalar, geyim və ayaqqabılar, inşaat materialları, məişət cihazları, məlumatın işlənməsi üçün avadanlıqlar, səsin və təsvirin qəbulu, yazılması, əks etdirilməsi üçün qurğular, telefon və fotoaparatlar, kiçik elektrik cihazları, mebel və ev əşyaları, xalça və digər döşəmə örtükləri, şüşə məmulatları, yemək qabları və əşyaları, yuyucu vasitələr, dərmanlar, minik avtomobilləri və onların ehtiyat hissələri, dəftərxana ləvazimatları, zərgərlik məmulatları bahalaşıb.
Ay ərzində əhaliyə göstərilən pullu xidmətlərdən hava və dəmiryolu ilə beynəlxalq sərnişindaşıma nəqliyyatında qiymətlər azalıb, tibbi xidmətlərin, avtobusla beynəlxalq sərnişindaşıma nəqliyyatı, avtomobillərin, məişət cihazlarının, mebel, ev əşyaları və döşəmə örtüklərinin təmiri, paltarların təmizlənməsi, təmiri və kirayəsi, restoranlar və kafelərdə yeməklə təmin edilmə, otel, mehmanxanada gecələmə xidmətlərinin qiymətləri isə artıb.
