Fevralın 10-da prezidentin iqtisadi islahatlar üzrə köməkçisi xidmətindən AZƏRTAC-a daxil olan məlumatda bildirilir ki, dövlət başçısı sahibkarların və investorların çoxsaylı müraciətlərini nəzərə alaraq “Valyuta tənzimi haqqında” qanuna yanvarın 19-da edilmiş dəyişikliyi imzalamadan Milli Məclisə geri qaytarıb.

“Valyuta tənzimi haqqında” qanunda dəyişikliklərə əsasən, bəzi kateqoriya şəxslər istisna olmaqla rezident və qeyri-rezident fiziki və hüquqi şəxslərin Azərbaycandan kənara xarici valyuta köçürməsi üçün əməliyyat məbləğinin 20 faizi miqdarında icbari yığımın tam məbləğdə dövlət büdcəsinə ödənilməsi tələb olunurdu.