Nyu-Hempşirdə Sanders və Tramp qalib oldu
ABŞ-da prezidentliyə iddiaçıların ilkin seçki yarışması davam edir. Novator.az-ın məlumatına görə, fevralın 9-da ilkin seçki Nyu-Hempşir ştatında keçirilib. Demokratlar Partiyasından seçkini Berni Sanders udub. İkinci yeri Hillari Klinton tutub.
Respublikaçılar Partiyasından Nyu-Hempşirdə Donald Tramp birinci olub. Con Kasic ikinci, Ceb Buş üçüncü yerdə qərarlaşıb.
ABŞ-da prezidentliyə iddiaçıların ilkin seçki yarışı Ayova ştatından başlamışdı. Fevralın 1-i Ayovada keçirilmiş ilkin seçkini respublikaçılardan senator Ted Kruz udmuşdu. Demokratlara gəlincə, sabiq dövlət katibi, 1993-2001-ci illərdə prezident postunu tutmuş Bill Klintonun xanımı Hillari Klinton Berni Sandersi cüzi fərqlə geridə qoymuşdu.
Respublikaçılar prezidentliyə namizədi 18-21 iyul qurultayında, demokratlar 25-28 iyul qurultayında seçəcəklər. Namizəd olmaq üçün ilkin seçkilərdə respublikaçı iddiaçı qurultaya 1237, demokrat iddiaçı 2383 nümayəndə qazanmalıdır.
ABŞ-da prezident seçkisi 2016-cı ilin noyabrın 8-də keçiriləcək.
