Seymur Həzi bəraət tələb edir
Jurnalist və siyasətçi Seymur Həzinin işinə yaxın vaxtlarda Ali Məhkəmədə baxılacaq.
Seymur Həzi “Azadlıq” qəzetinin əməkdaşı, AXCP-nin öncül şəxslərindəndir. O, 2014-cü il avqustun 29-da tutulub. Məhərrəm Həsənov adlı şəxsə xəsarət yetirməkdə ittiham olunan Seymur Həzi Abşeron Rayon Məhkəməsinin hökmü ilə 5 il müddətinə azadlıqdan məhrum edilib.
Hazırda 17 saylı Cəzaçəkmə Müəssisəsində saxlanan Seymur Həzi ittihamı rədd edir və hökuməti tənqid edən yazılarına, çıxışlarına görə siyasi sifarişlə həbs olunduğunu bildirir.
Onun vəkili Adil İsmayılov “Azadlıq” qəzetinə deyib ki, Seymur Həzinin işi üzrə kassasiya şikayəti ötən il dekabrın sonunda Ali Məhkəməyə təqdim olunub. Şikayətdə aşağı instansiya məhkəmələrinin hökm və qərarlarının ləğv edilməsi, cinayət təqibinə bəraətverici əsaslarla xitam verilməsi istənilir. İşin hansı hakimin icraatına verildiyi və prosesin vaxtı hələlik məlum deyil.
