Rəsul Cəfərovun şikayətinə baxılacaq
Fevralın 16-da Ali Məhkəmədə hazırda həbsdə olan hüquq müdafiəçisi Rəsul Cəfərovun şikayətinə baxılacaq.
İnsan Haqları Klubunun sədri Rəsul Cəfərov 2014-cü il avqustun 2-də həbs edilib. 2015-ci il aprelin 16-da o, Bakı Ağır Cinayətlər Məhkəməsinin hökmü ilə qanunsuz sahibkarlıq, vergidən yayınma, vəzifə səlahiyyətlərini aşma və mənimsəmədə təqsirli bilinərək 6 il 6 ay müddətinə azadlıqdan məhrum edilib. Həbsdəykən vergi borcunu ödədiyi üçün iyulun 31-də Bakı Apellyasiya Məhkəməsi hökmün vergidən yayınma maddəsi ilə bağlı hissəsinə xitam verib və Rəsul Cəfərovun cəzasını 6 il 3 aya endirib. Lakin Rəsul Cəfərov bütövlükdə həbs qərarından şikayətçidir. Onun azadlığa buraxılması haqda şikayətini isə apellyasiya instansiyası təmin etməyib. Buna görə də Rəsul Cəfərov kassasiya şikayəti verib. Şikayətində o, cinayət işinə tam xitam verilməsini istəyib.
Novator.az-ın məlumatına görə, kassasiya şikayətinə fevralın 16-sı saat 10-da hakim Fərhad Kərimovun sədrliyi ilə baxılacaq.
