Ümid partiyasında yeni sədr müavinləri
Ümid Partiyasının sədri İqbal Ağazadə fevralın 4-də üç gənci özünə müavin təyin edib.
Novator.az xəbər verir ki, partiya sədri Xanlar Abbasovu gənclərlə iş üzrə, Qədir Aslanovu insan hüquqları və əsas azadlıqların qorunması üzrə, İsmayıl Mirzəcanovu isə inzibati ərazi və bələdiyyə məsələləri üzrə sədr müavini postlarına təyin edib.
1983-cü il təvəllüdlü Xanlar Abbasov Füzuli rayonunun Merdinli kəndində doğulub. Azərbaycan Dövlət İqtisad Universitetinin biznesin təşkili və idarə edilməsi fakültəsini bitirib. 2009-2011-ci illərdə Ümid Partiyasının Gənclər Təşkilatının sədri olub. 2011-ci ildə təsis edilmiş Gənclərin Hüquqlarının Müdafiəsi Komitəsinin həmtəsisçisidir.
1987-ci il təvəllüdlü İsmayıl Mirzəcanov Lənkəran şəhərində doğulub. Naxçıvanski adına hərbi liseyi bitirib. ABŞ-ın Pensilvaniya ştatının Filadelfiya şəhərində Dreksel Universitetində təhsil alıb. Hazırda Ukraynanın Kiyev şəhərində Regionlararası Personalın İdarə Edilməsi Akademiyasında beynəlxalq əlaqələr ixtisası üzrə təhsil alır.
1987-ci il təvəllüdlü Qədir Aslanov Cəbrayıl rayonunun Nüzgar kəndində doğulub. Bakı Dövlət Universitetinin sosial elmlər və psixologiya fakültəsini bitirib. 2005-ci ildən bir sıra ictimai təşkilatın işində təsisçi və üzv olaraq iştirak edib.
